Commenced between the 25th and 31st May 1914.
क्रिस्तुं कन्यासुतं वंदे मृतं मृत्युंजयं परं |
रक्तीकृतासवं देहीकृतापूपमनश्वरं || १ ||
(Mathew 26:26-28)
क्षतपार्श्वं क्षततनुं धृतकंटकशीर्षकं |
क्षतपादं क्षतकरं धृतलोकाघगौरवं || २ ||
(John 19:34)
समुत्कीर्ण करं कीलविदारित पादद्वयं |
शूलविच्छिन्नहृदयं त्रिलोकीशमनश्वरं || ३ ||
याजकं यजनद्रव्यं नित्यं यज्ञभुजं भजे |
पापघ्नं पापरहितं लोकपापवहं परं || ४ ||
(Mathew 9:1-8, Luke 7:48, John 10:30 14:9 1:36)
स्थूलं सूक्ष्ममनादिंच सृष्टारं स्वर्गदायिनं |
सर्वक्षमं सर्वहेतुं सर्वव्यापिनमक्षयं || ५ ||
(John 4:24)
सुग्रहं शांत चित्तानां दुर्ग्रहं विषयैषिणां |
शरणं पापिनामेकं तरणं पापवारिधेः || ६ ||
(Mathew 5:8)
आसवीकृत कीलालं वाङ्मात्रकृत भक्षणं |
शमितांबु निधिक्षोभं मृतोत्थापित मित्रकं || ७ ||
(John 2, Mathew 14:17-20 15:34-37 8:26, John 11)
मर्त्यपुत्रं देवपुत्रं नरमप्यनरं परं |
कन्यापुत्रं जगत्तातं जातमप्यजमीश्वरं || ८ ||
(Daniel, Mark 2:10, Mathew 3:17, Mark 9:1-17, Luke 22:66-70, John 5:17-19, Mathew 1:22-23)
द्वितीयमप्यद्वितीयं त्रयमप्येकमेवच |
मृतमप्यमरं नित्यं जातमप्यखिलोत्भवं || ९ ||
(John 10:30)
आक्षिप्त वसनं वंदे स्थाणुबद्धकरद्वयं |
भटताडितसर्वांगं पूज्यमप्यतिधिक्कृतं || १० ||
स्वर्गस्थं पितृपार्श्वस्थं हृदयस्थं जगत्पतिं |
अभिषिक्तमृषिप्रोक्तं अर्वाचीनं पुरातनं || ११ ||
(Isaiah)
तारासूचितजन्मानं ज्योतिषाराद्धमर्भकं |
गोष्ठजं पथिकं वंदे राजानं राजपूजितं || १२ ||
(John 18:37, Luke 22:29-30)
शिशुसूदनसंत्रातं देशांतरगतं शिशुं |
गोपालपूजितं दिव्यं वंदे विस्मितवैदिकं || १३ ||
[विस्मायितमहाचार्यं गोपपूजितविग्रहं || १३ ||]
(Mathew 2, Luke 2:41-48)
वाचमाद्यतमामीशं स्थितांवंदे पुरातनीं |
प्रपंचकारणं साक्षादीश्वरं जीवसंश्रयं || १४ ||
(John 1:1-3)
प्रदीपं तिमिराज्ञातं लोकजातप्रदीपकं |
जगदागतमज्ञातं जगता जगतः प्रभुं || १५ ||
(John 1:4-5,9-10)
राजर्षिगोत्रजं धन्यं निर्द्धनं नित्ययाचकं |
दीनं दीनाश्रयं वंदे जगतामेकमीश्वरं || १६ ||
(Mathew 1, Luke 9:58, John 19:5, Mathew 11:28)
यतिस्नपितवर्ष्माणं परमात्मप्रशोभितं |
यतिसंस्कृतवर्त्मानं ऋषिलोकप्रतीक्षितं || १७ ||
(Luke 3:21-22, Mark 1:1-8)
कपोतावतरज्ञातं दिव्यमेषं सनातनं |
शांतं शांतिमतामाद्यं प्रणमाम्यघसूदनं || १८ ||
(John 1:29,32-33)
आकृष्टमीनं कैवर्त्तशिष्यमेकं जगद्गुरुं |
उपदिष्टजगद्धर्मं वंदे वंदारु वंदितं || १९ ||
(John 21:6)
शमवंतं क्षमावंतं तितिक्षावंतमीश्वरं |
दमवंतं दयावंतं आत्मवंतं जगद्गुरु || २० ||
धृतव्यजनमश्रांतं पूतग्राहिणमीश्वरं |
बुसदाहिनमक्षांतं प्रणमामि भयंकरं || २१ ||
(Mathew 3:12, Psalms 75:8)
समाधिस्थमतिश्रांतं क्षुदाविष्टमुपोषितं |
प्रणमामिनियंतारं पिशाचपरिशोधितं || २२ ||
(Mathew 4:1-11)
मेघयानं तडित्पाणिं घोराकारं भयानकं |
पापिनामंतकं वंदे धर्मिणां जीवदायिनं || २३ ||
(Mathew 24:30, 25:31-46)
लवित्रपाणिंगांगेयकिरीटं मेघवाहनं |
लवितारं मनुष्याणां नमामिमनुजात्मजं || २४ ||
(Revelation 14:14)
विधवाकरुणं वंदे परमित्रं कृपाकरं |
वितातशरणं श्रेष्ठं पतितोत्क्षेपिणं प्रभुं || २५ ||
(Psalms 146:9)
अंधानां दृष्टिदंवंदे सत्यसंधंसनातनं |
निगडध्वंसिनं देवं आर्त्तत्राणपरंपरं || २६ ||
(Psalms 146:7-8)
सर्पख्नीतनुजं वंदे सर्पारातिं महाबलं |
सर्पंदमं जगन्नाथं सर्पवंचितपूर्वकं || २७ ||
(Genesis 3:6,15)
श्वेताश्ववाहनं रक्तसिक्तवाससमीश्वरं |
दिव्यवागभिधं वंदे राजराजंप्रभुप्रभुं || २८ ||
(Revelation 19:11,13,16)
श्वेतांबरबलं घोरं ज्वलनोद्गारलोचनं |
द्विधारखड्गवदनं स्वनामांकितवाससं || २९ ||
(Revelation 19:14-16)
सप्तर्क्षपाणिं लोकेशं तप्तपित्थलपादकं |
श्वेतांबरं श्वेतकेशं वंदे सूर्यमुखं परं || ३० ||
(Revelation 1:13-16)
सप्तशृंगं हतप्रेक्ष्यं सप्ताक्षं मेषशाबकं |
मुद्रास्फोटकमीशानं व्योमचापावृतासनं || ३१ ||
(Revelation 4:3 5:5-6)
गोवत्ससेवितं सिंहपूजितं गृद्ध्रवंदितं |
वृद्धवृंदस्तुतं वंदे नरवक्त्र मृगार्चितं || ३२ ||
(Revelation 4:6,7,10)
स्वर्गसिंहासनं रत्नपीठं सप्तप्रदीपकं |
श्वेतरोमाणमीशानं वंदे कांचनमेघलं || ३३ ||
(Revelation 1:14 4:2-3)
समुद्रनादिनं राजवेश्याघातिनमीश्वरं |
क्रुद्धंपापद्विषं वंदे वंद्यंद्राक्षापमर्द्दिनं || ३४ ||
[क्रुद्धंपापद्विषं वंदे वंद्यंद्राक्षाविमर्द्दिनं || ३४ ||]
(Revelation 1:15 17:1-2 19:15)
दशशासनमक्षीणं सासूयं प्रणमाम्यहं |
प्रतिमाद्विषमीशानं हव्यवाहनवाहनं || ३५ ||
(Exodus 19:18 20:4-5)
कन्यकानुगतं कृष्णाकांतं सन्यासिनं परं |
सुंदरीरमणं वंदे सुंदरं दमितेंद्रियं || ३६ ||
(Revelation 14:4, Song of songs 1:4,16, Mathew 7:19-20 11:29)
धवलं पाटलं श्यामकेशं वासितगंडकं |
चामीकरकरं कन्यावरं वंदे परापरं || ३७ ||
(Song of songs 5:10-11,13-14)
पक्षवातहरं दीनत्राणलोलं ज्वरंदमं |
भूतद्विषं कुष्ठहरं वंदे दिव्यौषधं परं || ३८ ||
(Mark 1:23-26,30-31,40-42 2:3-12)
दोषघ्नमनघं रक्तस्रावापहमनुत्तमं |
दुष्प्रधर्षं महावीर्यं वंदे दिव्यौषधं परं || ३९ ||
(Mathew 7:2-22, Psalms 75:8)
प्रदीप्तवदनं वंदे तुषारधवलांबरं |
ऋषिसेवितमानंददायिनं भास्करप्रभं || ४० ||
(Mathew 17:1-4)
वलाहकावृतं पूज्यं गिरीशं गिरिवासिनं |
शिष्योपास्थितमुत्कृष्टं पितृश्लाघितमात्मजं || ४१ ||
(Mathew 17:5, Isaiah 8:18, Psalms 132:13)
श्वेतवाहं धनुष्पाणिं सेनान्यं दिग्जयोन्मुखं |
मारी दुर्भिक्ष सहितं वंदे संग्रामतत्परं || ४२ ||
(Revelation 6:2,8, Psalms 74:13)
लोहिताश्वानुचरितं कृष्णवाहोपसेवितं |
पीतवाहादृतं वंदे शास्तारंघोरमक्षयं || ४३ ||
समुद्रच्छिदमच्छेद्यं परंतपमरिंदमं |
प्लावितारातिनिवहं घोरंवंदे जनार्द्दनं || ४४ ||
(Exodus 14, Habakkuk 3:6)
अविकार्यमविच्छेद्यं नमामि परमेश्वरं |
अनादिमादिमं वंदे अनंतं शांतमंतिमं || ४५ ||
(Revelation 22:13, Isaiah 14:4)
स्वर्गांकुटधरं वंदे सर्पं नहमधीश्वरं |
पुरं दहं पुरीकांतं जीवतोयप्रदायिनं || ४६ ||
(Genesis 19:24-25, Revelation 20:2 21:6)
अमेयमनघं नित्यं अमोघमघनाशनं |
अग्राह्यममलं देवदेवं वंदे निरंतरं || ४७ ||
अमृतं शाश्वतं सत्यं अप्रमेयं स्वयं भुवं |
प्रभविष्णुं प्रभुं वंदे भूत भव्य भवत् प्रभुं || ४८ ||
अक्षयं भूवनाध्यक्षं अक्षरं पुरुषोत्तमं |
अव्ययं प्रयतात्मानं प्रणमामिप्रतापनं || ४९ ||
स्थिरं स्थविष्ठं स्थविरं समात्मानं क्षमायुतं |
ऊर्जितं सुषमावंतं वंदे तेजस्विनं प्रभुं || ५० ||
अदृश्यमप्यतिव्यक्तं अपरीक्ष्यमतींद्रियं |
प्राणदं वरदं वंदे देवं जीवद मादृतं || ५१ ||
अनिरुद्धं दुराधर्षं सर्वशक्तिं महाबलं |
ओजस्विनं महावीर्यं वंदे दुर्मर्षणं विभुं || ५२ ||
(Psalms 75:7)
धातारं भुवनाधारं कर्त्तारं प्रणमाम्यहं |
भर्त्तारं प्राणदातारं पापहर्त्तारमीश्वरं || ५३ ||
होतारं प्रयतं हव्यं हुताशं पापनाशनं |
हूयमानं हुतं वंदे हितं प्रहितमात्मजं || ५४ ||
अत्भुतं मंत्रिणं सर्वशक्तिं देवंनमाम्यहं |
भविष्यल्लोकजनकं शमराजंजगत्पतिं || ५५ ||
(Isaiah 9:6)
पावनं भावनं जीवसाधनं सर्वशोभनं |
कारणं शरणं पापशोषणं प्रणमाम्यहं || ५६ ||
राजानंगिरिजा राजं खरवाहनमादृतं |
पौरवृंदस्तुतं वंदे पूज्यं राजर्षिगोत्रजं || ५७ ||
(Zachariah 9:9, Mathew 21:7-9)
प्रोषितं राजसंत्रासात् मृतेराज्ञिसमागतं |
प्रचारितमहासत्यं प्रणमामि महागुरुं || ५८ ||
(Mathew 2:14,21)
विश्वंभरं विश्वसृजं विश्वयोनिमनश्वरं |
विश्वस्तमात्मजंवंदे विश्वोत्कर्षप्रचोदितं || ५९ ||
यत्पापमकरोत्पूर्वं नराणामादिमो नर: |
परिहर्त्तुं तदुद्युक्तं देवपुत्रं नमाम्यहं || ६० ||
यातिष्ठदंबरेतन्वी वसाना सूर्यमण्डलं |
शशांकं पादुकीकृत्य तस्या: पुत्रं नमाम्यहं || ६१ ||
(Revelation 12:1)
यांतारमकुटां तन्वीं प्रसवव्यथयाकुलां |
अभ्यद्रवन् महानागस्तस्या: पुत्रं नमाम्यहं || ६२ ||
(Revelation 12:2-4)
यंजातमात्रं सर्पोशाद् भ्रूणभक्षणकांक्षिण: |
सप्तोत्तमांगाद्रक्ताभादत्रायत महेश्वर: || ६३ ||
तंदेवपुत्रंलोकानां रक्षकंनागविद्विषं |
महाशक्तिं महावीर्यं प्रणमामि महाबलं || ६४ ||
यस्यरक्तप्रभावेण निर्जितशक्तिमान् फणी |
अंबरादपतद्भ्रमौ तंवंदेमेषशाबकं || ६५ ||
(Revelation 12:11)
अयोदंडधरंलोकराजन्यायविशारदं |
कन्यकातनुजंपापान् दंडयंतं नमाम्यहं || ६६ ||
(Revelation 12:5)
शासनानिप्रदातुं य: पुरातनमहर्षये |
आविर्बभूव शैलाग्रे तं वंदे शैलशायिनं || ६७ ||
(Exodus 19:20)
यस्यशापेन विफलो भूरुहश्शुष्कतां गतः |
तं वृक्षशोषणं देवं वंदे नैष्कर्म्यविद्विषं || ६८ ||
(Mathew 22:19)
वधस्तंभध्वजं मीनपताकं मेषपालकं |
दयार्द्रहृदयं वंदे दीनबंधुं जगत्पतिं || ६९ ||
(Ichthus, John 10:14, Mathew 11:28)
कर्मसाक्षिणमक्षीणमक्षयं रक्तसाक्षिणं |
धर्मसाधनमानंदसाधनंप्रणमाम्यहं || ७० ||
अविनीतविनेतारं नतोन्नेतारमुत्तमं |
नित्यधर्मप्रणेतारं प्रणमामिविनायकं || ७१ ||
(Psalms 74:8)
प्रणमामिमहावीर्यं जीवापूपं शिवंकरं |
यंजग्ध्वामनुजायांति जीवितं शाश्वतं दृढं || ७२ ||
(John 6:35,54-55)
कर्त्तारमुपकर्त्तारं प्रतिकर्त्तारमुत्तमं |
भुवनानांविकर्त्तारं अविकार्यं नमाम्यहं || ७३ ||
(Psalms 30:24 32:20)
वेदज्ञं विदुषामाद्यं वेदमूलं सनातनं |
वैदिकं परमं वंदे भिषजं देहिदेहयो: || ७४ ||
(Zachariah 3:8)
पानीयं परमंभक्ष्यमुत्तमं प्रणमाम्यहं |
यदभुक्त्वानरायांति नरकंशाश्वतंदृढं || ७५ ||
(John 6:35 7:37)
पावनं पावकं पूतं वंदे रजत पावनं |
स्वर्णपावनमाचार्यपावनं लोकपावनं || ७६ ||
(Malachi 3:2-3)
तुषानलं तुषाराभं खलप्वं खलमर्द्दनं |
असहिष्णुं बलोपेतं वंदे कल्मष विद्विषं || ७७ ||
(Mathew 3:12, Psalms 75:8)
किंकरं परमं दिव्यं वंदे प्राची प्रभाकरं |
भास्करं जगतामेकं दिव्यतत्वप्रभासकं || ७८ ||
(Zachariah 3:8)
वंदे प्रस्रवणं नित्यं क्षाल्यमाणाघकर्दमं |
सर्वप्राप्यं सर्वयोगं सर्वलोकप्रतीक्षितं || ७९ ||
(Zachariah 13:1)
देवद्देवं द्युतं द्युत्यास्सत्येशाल् सत्यदैवतं |
असृष्टं जातमेवैकं वंदे तातं समं सुतं || ८० ||
(Nicene creed)
येनसृष्टं जगत्सर्वं दृश्यञ्चादृश्यमीश्वरं |
अनंतराज्यं वंदेहमवतीणं नराकृतिं || ८१ ||
[दृश्यादृश्य विधातारं जगतामादिकारणं |
आगमिष्यंतमक्षोभ्यं वंदेहं नीति पालकं || ८१ ||]
(Nicene creed, Luke 1:33)
अक्षौहिणीपतिं वंदे यशोराजं यशस्विनं |
बलिनं जयिनं धीरं घोरयुद्धपराक्रमं || ८२ ||
(Psalms 23:7-10)
सत्याध्वानं दयामार्गं शांतानां मार्गदर्शिनं |
धर्मिष्ठं मधुरं वंदे पापिनां न्यायदायिनं || ८३ ||
(Psalms 24:8-10)
वागुरा भंजकं वंदे तरुभंजन निस्वनं |
मरुकंपननिर्घोषं स्तनितायुधमीश्वरं || ८४ ||
(Psalms 24:15, 28:3,5,8)
त्र्यंगुलोन्मित भूगोलं करसंभृतवारिधिं |
तुलोच्चितनगंवंदे करस्थाकाशमंडलं || ८५ ||
(Isaiah 40:12)
दुर्बलानां बलं वंदे संतप्तानां सुखप्रदं |
स्वर्गदं दंभहीनानां शांतानां भूमिदायिनं || ८६ ||
(Mathew 5:3-7)
तर्पकं नीतितृष्णानां कृपालुं करुणावतां |
प्रत्यक्षं शुचिचित्तानां वंदहं परमेश्वरं || ८७ ||
(Mathew 5:3-7)
यात्रानमित शैलाग्रं यशोव्याप्तनभस्थलं |
अचलध्वंसिनं भूमिमातारं प्रणमाम्यहं || ८८ ||
(Habakkuk 3:3,6)
रक्षारथं महादेवं शराभास्तिमितारुणं |
शूलप्रभाहतादित्यं वंदेहं सुप्राक्रमं || ८९ ||
(Habakkuk 3:8,11, Psalms 23:8)
च्यावीतांभोनिधिं वंदे पर्वतद्रुहमुल्प्रभं |
ज्वलितास्त्रं महामर्षं भीषितार्क निशाकरं || ९० ||
(Habakkuk 3:8,10-11, Psalms 23:8)
रथिनं वाहिनं वंदे चापिनं दीप्त पत्रिणं |
शूलिनं बलिनं वीर्यशालिनं तीक्ष्णशापिनं || ९१ ||
(Habakkuk 3:8-9,11, Psalms 23:8)
अंभोनिधिपथं शुंभत् कलंबं दंभविद्विषं |
कुंभिनीमर्द्दितं शातकुंभमेखलमुत्कटं || ९२ ||
(Habakkuk 3:15)
दंडिनं खड्गिनं वंदे किरीटनमरूपिणं |
घृणिनं जयिनं पारं दुर्जयं जितकाशिनं || ९३ ||
चतुश्शतांगंविख्यातं जितलोकत्रयं विभुं |
नररूपिणमच्छाभं वंदे प्राचीनभास्करं || ९४ ||
(Zachariah 6:1,13)
वंदे सागरवर्त्मानं सनातनदयं प्रभुं |
समुद्रदारिणं श्रेष्ठं नित्यमाश्रितवत्सलं || ९५ ||
(Habakkuk 3:15, Psalms 106:1, Exodus 15)
प्रकृतिज्ञं महावैद्यं सर्वरोगविनाशनं |
प्राणत्रायिणमीशानं वंदे कामप्रदायिनं || ९६ ||
(Psalms 102:3-5, 103:14)
व्योमविस्तारिणं वंदे शोभावाससमीश्वरं |
अंभोदस्यंदनं वायुपक्षचारिणमुल्प्रभं || ९७ ||
(Psalms 103:2-3)
समुद्रशासनं देवदेवं सागरशोषणं |
तोरणध्वंसिनं वंदे बालार्कं बालपंडितं || ९८ ||
(Psalms 106:9 107:16, Zachariah 6:12, Luke 2:47)
नरकद्वंसिनं स्वर्गद्वारं रक्षाविशारदं |
अपराधसहं वंदे धर्मिणां परमां गतिं || ९९ ||
(Psalms 103:3)
शांताकारं भुजगमथनं स्वर्गवासं महाभं
पापार्तानां शरणमघ निर्मूलनं मेघयानं |
कृष्णाकांतं विमलहृदयं लोकनाथं महेशं
वंदेदेवं सुगममघविच्छित्तये क्रिस्तुमीशं || १०० ||
(Genesis 3:15)
Finished at 7:30 A. M. on Friday, 26th June 1914.
त्रातारमभयस्थानं अभयंकरमुत्तमं |
सहायंबलसम्युक्तं वंदेविद्यांक्षमां || १०१ ||
(Psalms 71:1-5)
1st July 1914.
दिनेशं शर्वरीनाथं सरिच्छोषणमीश्वरं |
मर्यादास्थापकं वंदे कालकारं जगत्प्रभुं || १०२ ||
(Psalms 74:10,16-17)
निर्झरध्वंसिनं वंदे वाहिनीभंजकं प्रभुं |
ग्रीष्मकारं मधुकरं काल्यकारं दिवाकरं || १०३ ||
(Psalms 74:10,16-17)
त्रातारंदीनपुत्राणां निपीडकविनायकं |
आसमुद्रमहाराज्यं वंदे भूपालपूजितं || १०४ ||
(Psalms 71:4,8,11)
सर्वराष्ट्रादृतं वंदे सर्वराष्ट्र प्रकीर्त्तितं |
नृपराराधितंदेवं एकमत्भुतकारिणं || १०५ ||
(Psalms 71:11,17-18)
समुद्रश्यायकं वंदे जलनागशिरच्छिदं |
महानामानमीशानं चापचर्मासिभंजकं || १०६ ||
(Psalms 73:13 75:2-4)
प्रेषकं प्रेषितं वंदे व्यतीतान्वेषकं शिवं |
हृद्विचायकमाचार्यं हृषीकेशमृषीश्वरं || १०७ ||
(John 9:5)
न्यायाधिपं महानीतिं प्रणमामि महाक्षमं |
खड्गपाणिं महाशक्तिं घोरं पूरितकार्मुखं || १०८ ||
(Psalms 7:12-13)
दृश्यादृश्यविधातारं जगतामादिकारणं |
आगमिष्यंतमक्षोभ्यं वंदेहं नीतिपालकं || १०९ ||
शांताय शांतहृदयाय शमप्रियाय
कांताय कांतचरिताय कमालयाय |
नित्याय नित्य विजयाय निरंतराय
मर्त्याय मर्त्यतनुजाय नमोस्तु नित्यं || ११० ||
[Transliterated to Devanagari script and typed by David C. Kandathil, 19th October 2008.]
© Oct. 2008. David C. Kandathil, Chempu, Vaikom (kandathil@gmail.com). All rights reserved.